自古人心最難測，車仔曼聯兩支英超勁旅於聖誕快車檔期遭遇一連串「怪誕疑團」，但只要讀懂「人心」，就知背後原因。

疑團一：迪亞高哥斯達離奇復蘇；個個都估佢唔妥摩佬、故意踢得差逼走教頭，結果摩佬一走此君對屈福特即入兩球，就是為大家解疑惑：「唔使估喇，我認！」

疑團二：迪亞高哥斯達入兩粒都贏唔到？必有摩佬「嫡系」球員在攪攪震；當年摩佬重金回購、呢場犯手球輸12碼嘅尼曼查馬迪嫌疑最大！

疑團三：點解最後奧斯卡射失12碼？可能佢對軒迪克上任都唔滿意，想同老闆講：「換過個啦！」

疑團四：曼聯八場不勝，大家一定以為班球員想學車仔球員咁夾埋逼走雲高爾？未必！反而大家太想為球隊付出，但見輸畀般尼茅夫一戰，有波入兼全場最搏命的費蘭尼竟被雲帥中途換走，眾將唔想步佢後塵，於是集體行行企企，以免太搶鏡而被雲帥換走。疑團五：馬達(圖左)最搏命？佢可能信雲高爾被炒會由摩連奴上任，當年喺車仔被摩佬踢走嘅佢，梗係搏老命唔想摩佬過嚟喇！疑團六：曼車大戰0:0：呢場大戰，兩隊表現最出色嘅都係門將，證明兩隊門將同場中各懷鬼胎的球員毫無溝通，只識盡力做好自己本份。