奪標大熱曼城展開衞冕之旅，英超首戰周六早場作客東倫敦韋斯咸。曼城人強馬壯，由季前熱身賽開始，備戰循序漸進，「本土三冠王」實力比韋斯咸強之餘，近4次造訪「錘仔幫」都大勝，「藍月亮」讓球半/兩球，上盤唔怕捧場。

（Now 621周六晚7時30分直播）

曼城於社區盾互射12碼擊敗利物浦捧盃，雖然利萊辛尼十字韌帶受傷，估計要抖6至9個月，但「藍月亮」骨幹陣容沒太大轉變，上季球隊神射手阿古路、英格蘭足球先生史達寧、大衞施華、奇雲迪布尼、基爾獲加及艾達臣摩拉斯悉數留效。該仗領隊哥迪奧拿亦非精銳盡出，阿古路喺後備席沒有上陣，留力今場聯賽開咧戰。

韋斯咸主帥倒戈冇心得
曼城喺轉會市場分別從馬德里體育會同祖雲達斯買入洛迪卡斯簡迪及祖奧簡斯路，前者防守出色，喺西甲上陣34場作出103次攔截，280次助球隊重奪控球權，兩項數據都係西甲之首，可以為曼城增強防守及轉守為攻嘅能力。至於司職右閘嘅祖奧簡斯路同樣係防守同助攻力均強嘅球員，非常適合哥帥嘅作戰體系。

韋斯咸近季都比上不足、比下有餘，今夏簽入維拉利爾中場柏保路科奴斯增強實力，但呢位技術型中場未知能否適應英超體力化踢法。上季接掌「錘仔幫」嘅領隊比歷連尼，雖曾執教曼城，但佢對住曼城似乎冇咩特別心得，連同上季主場淨吞4蛋在內，球隊近4次主場對曼城都輸3球或以上，相信「藍月亮」今場亦可輕鬆大勝，上盤值得捧場。