進攻型交鋒鬥數胡
日職今日有多場直播，頭場先有北海道札幌岡薩多主場鬥浦和紅鑽。岡薩多主場出擊踢法進取，開季至今只有1場聯賽主場食白果；紅鑽近期入得又失得，連續4場聯賽總入球開3球或以上，今場首選中位數2.5球大盤。
（有線602及662台周六下午1時直播）
岡薩多自從上季由塞爾維亞教頭柏度域領軍後，成績顯著有進步，由前季聯賽排名11跳升至上季第4位，最主要原因係佢哋主場水準好穩定。岡薩多今季9場聯賽主場5勝2和2負，只有1場冇入波，其餘8場加埋入咗19球，當中10球來自兩大外援射手安達臣盧比斯及保夫萊特，喺主場球迷面前腳風特別順，睇嚟又係兩人數胡好時機。
小野伸二被外借到琉球
人腳方面，岡薩多今場有中場荒野拓馬復出，而深井一希膝部傷勢比想像中嚴重，會方宣布此子要長抖一段時間。同時，繼中堅中村桐耶外借後，老將小野伸二亦被借到日乙FC琉球，今場係佢嘅告別戰，一定要搏殺氹Fans。
紅鑽近4場聯賽僅得1勝，狀態唔算理想，不過球隊連續2場都喺落後情況下，逼和兩支前列球隊鹿島鹿角及名古屋鯨魚，鬥心冇受影響，加上小將柴戶海坐完波監復出，人腳充裕唔會咁易放軟手腳。紅鑽近4場聯賽入7球、失7球，3次總入球開3球或以上，加上近4次鬥岡薩多亦有3次開3球或以上，預計今場亦會出現不少入球，中位數2.5球大盤最穩陣。
