揭幕戰即搶諾域治
2019/20賽季英超周六凌晨開鑼，打頭陣嘅利物浦將會坐鎮晏菲路球場，迎戰新升班嘅諾域治。紅軍實力超強，「埃及文明」進攻組合早就證明有能力撕破任何防線，況且兩軍近年交手頻頻演入球騷，呢場中位數3.5球入球大值博。

（Now 611及621周六凌晨3時直播）

利物浦早前喺社區盾同曼城90分鐘打成1比1，最終雖然互射12碼不敵對手飲恨，不過經歷激戰一場，球員明顯已經收拾季前備戰嘅輕鬆心情，作戰狀態有所提升。紅軍今夏轉會窗動作唔算大，皆因球隊原班陣容無論默契還是實力都有保證，隨住沙迪奧文尼踢完非洲盃之後已經回歸大軍，佢、羅拔圖法明奴同穆罕默德沙拿所組成嘅「埃及文明」三叉戟組合已經齊章，加上福將奧歷治，領隊高普絕對可以做出唔同嘅進攻選擇。

近6次交手5次開入球騷
闊別英超3季嘅諾域治，上季以英冠1哥身份取得直接升班資格重回英格蘭頂級聯賽，佢哋之所以可以喺次級聯賽封王，同球隊崇尚控球在腳嘅進取型踢法有好大關係，不過升到上嚟英超，面對整體實力更强嘅各路豪强，「金絲雀」以往嘅技術優勢蕩然無存，一班球員喺心態上能否適應轉變，依然係未知之數。為咗增强競爭力，諾域治都引入咗前韋斯咸後衞森拜林等新兵，但最值得期待嘅，肯定係頭號前鋒迪姆普基嘅表現，芬蘭人上季以29個聯賽入球成為英冠神射手，今仗有佢擔起進攻重任，諾域治隨時以攻代守放手一搏。

況且諾域治近6次面對利物浦，有5次開4球或以上，今次對攻戰在所難免，中位數3.5球入球大值得留意。