Goal手如雲以攻代守
今日盃賽做主打，當然唔少得歐聯外圍賽第3圈首回合喇，阿King睇中卡斯洛達主場迎戰波圖。葡超勁旅波圖陣中「Goal」手如雲，今場面對同樣好大喜「攻」嘅俄超新貴卡斯洛達，隨時合演入球騷，中位數2.5球大盤不容錯過。

（周四凌晨1時開賽，馬會網上文字直播）

波圖雖有奧利華托利斯和艾達米列達奧等中後場球員離隊，好彩留住鋒線兩位射手馬利加和阿布巴卡之餘，更有日本國腳中島翔哉加盟，多埋呢位擅於鋪橋搭路嘅進攻中場支援，火力更盛。貴為歐聯常客，波圖經驗豐富，不過佢哋防線唔夠穩陣，因此打親歐聯都以攻代守，近8場歐聯狂轟17球、失14球，有7次開3球或以上，可見呢支葡超班霸進攻大過天。

上季俄超季軍卡斯洛達首度參加歐聯，最大弱點經驗唔夠，尤其後防經常犯錯，不過今夏簽入法國進攻中場雷米卡比拿，野心唔細，呢支上季俄超火力第二強嘅球隊主場搶得就搶，大盤必捧。

悉尼添猛將半場屠獅
至於下午上演嘅澳足盃32強，FC悉尼主場迎戰布里斯班獅吼。FC悉尼貴為上季澳職季後賽冠軍，今夏簽入墨爾本勝利快翼巴巴路西斯，配合射手方祖，可謂如虎添翼；獅吼陣容變動太大未磨合，隨時半場都頂唔住，強捧半場主勝。（周三下午5時30分開賽）最後係聽朝巴甲哥連泰斯主場對戈亞斯，哥連泰斯狀態復甦，單計近11次主場取得7捷，而且近4次聯賽對戈亞斯獲3勝1和，上盤有計。

（周四早上6時15分開賽）