今晚國冠盃大戰，熱刺返主場迎戰國際米蘭。熱刺於季前熱身賽極速上力，先後贏過祖記及皇馬，新兵尼當比利亦表現對辦，相反國米「拍跳」戰績麻麻之餘，受困於組軍問題未買到前鋒，鋒力極為疲弱，客場出擊難言惡，主勝有計。

（myTV Gold及無綫85台周日晚10時直播）

熱刺今季陣容比上季更強，除咗哈利卡尼、基斯甸艾歷臣、孫興民等主力留隊，更破球會轉會費紀錄簽入尼當比利，呢位法國防中擅於串連，首度上陣對祖雲達斯第一腳掂波即交出助攻，有佢坐鎮中路，令迪利阿里及基斯甸艾歷臣更專心於前場組織攻勢。連同其他季前熱身賽在內，熱刺近4場於法定時間取得2勝1和僅1敗，曾擊敗祖記及皇馬，上仗奧迪盃互射12碼贏埋東道主拜仁攞晒彩，成班波上晒力。

國米組軍問題未解決
另一邊廂，國米新帥干地接手後，組軍問題仍未解決，有離心嘅射手莫路伊卡迪前途未明，斟介曼聯箭頭盧卡古亦進展緩慢，陣中唯一正宗前鋒拿達路馬天尼斯啱啱歸隊，狀態未足。因此季前熱身賽只用新仔施巴斯天奴艾斯普薛圖，或比列錫客串打前鋒，效果梗係唔好喇，難怪近3場熱身賽，法定時間內只得2和1負，入得2粒咁大把，亦睇得出干地仍未搵到最佳陣容而不斷試陣。加上熱刺近3次國冠盃面對意甲球隊全部贏晒，今場有埋地利，主勝捧得過。