鬥唔齊腳Hea住當熱身
話咁快英超下星期又返嚟，今個星期打頭陣係社區盾。近年社區盾受重視程度愈來愈低，已淪為一場高規格熱身賽，除主將唔保證上陣外，好多時更盡用六個換人名額收練兵之效，今晚曼城同利物浦喺溫布萊交鋒，既然兩隊都唔齊腳，樂比會揀兵源較充裕同狀態較佳嘅1.8倍曼城客勝。

（周日晚10時開賽，馬會網上文字直播）

利物浦今季陣容冇大變，主力陣容都喺番晒度，不過前線三叉戟「埃及文明」穆罕默德沙拿、沙迪奧文尼同羅拔圖法明奴暑假分別要踢非洲國家盃同美洲國家盃延遲歸隊，開鑼前都未有充足時間休息同準備，其中沙拿同法明奴都只係踢過一場熱身賽，文尼更要到踢完社區盾至歸隊，由於呢三個球員主宰咗紅軍嘅進攻命脈，所以影響可謂非常大。

利物浦「埃及文明」踢唔足
睇番利物浦熱身賽嘅成績，冇咗「埃及文明」只係得2勝1和3負，兩場勝仗都係頭兩場贏低組別球隊，之後對多蒙特、西維爾同拿玻里即輸波現形，即使法明奴同沙拿上仗復出即助利物浦擊退里昂，但兩人僅上陣30分鐘同45分鐘，高普今仗亦未必會冒險畀佢哋踢足全場。

當然，曼城嗰邊亦有影響，遲咗歸隊嘅阿古路，加比爾捷西斯，艾達臣摩拉斯及馬列斯據講今仗亦未必會正選上陣，另外費蘭甸奴亦有傷，不過曼城嘅板櫈深度真係好厚，一眾新兵都力爭上位，季前熱身賽表現相當好。

事實上，曼城喺亞洲之旅顯示出相當好嘅狀態，取得3勝1和佳績，好似史達寧，奇雲迪布尼都相當弗，加上利萊辛尼續約一事似乎已接近完成，若成功挽留佢嘅話，曼城今季火力必繼續強勁，今場一於捧佢旗開得勝！