法冠盃今晚喺深圳舉行，由上季法甲盟主巴黎聖日耳門（PSG）對上季法足盃冠軍雷恩。PSG實力超班，但王牌尼馬成日嗌走難免影響軍心，而且近年對雷恩例演入球騷，不妨直取中位數3.5球嘅大盤。（myTV Gold 302、Now 639、有線655及615台周六晚7時30分直播）
巴西球星尼馬嘅經理人團隊日前表明，呢位27歲前鋒唔會再為PSG上陣，可見佢同球會關係徹底破裂。由於法甲轉會窗喺8月10日關閉，若然尼馬未能喺死線前轉會，意味新球季起碼有一半時間坐冷板。法國《隊報》爆料，巴塞隆拿趁機再向PSG提出回購尼馬，但之前用咗1.2億歐元買基沙文，無法再攞出1.8億歐元收購尼馬，早前提出用球員加現金交換又被拒絕，所以巴塞希望先借後買，等出年夏天再找數。
近8交鋒7次開4球或以上
儘管尼馬都有隨隊到中國，但幾場熱身賽並冇上陣，預計今仗亦唔會披甲，幸好新核心基利安麥巴比及老將卡雲尼保持水準，上場同FC悉尼「拍跳」各省1粒，但PSG近4仗熱身賽只得1場冇失波，防線唔穩陣。雷恩今夏有老將賓艾化同班捷文安達離隊，但正式買斷箭頭麥巴耶尼安，鋒力仍有保證，兩軍近8次交手共炮製36個士哥，當中7次開4球或以上，包括上屆法足盃決賽法定時間和2比2，雷恩憑互射12碼爆冷贏波捧盃，今仗隨時又演入球騷。
