周六凌晨多場大戰上演，等阿King講講過關好路。其中英冠開咧戰，新軍盧頓將會主場挑戰米杜士堡，新賽季由球隊名宿活基治執教嘅米堡，近年喺英冠有一定競爭力，呢場對住新升班嘅盧頓，平手盤實揀米杜士堡。

（周六凌晨2時45分開賽）

米堡上季最終同「6哥」打比郡只差1分，無緣升班附加賽實屬可惜，查實佢哋近兩季喺英冠排名都靠前，表現保持强勢，今季仲搵嚟名宿活基治領軍，希望再次力爭升班資格。上季頭號射手艾桑巴朗加仲喺陣中，絕對係米堡搶分本錢。佢哋上季作客3次面對新升班球隊取得2勝1和，專劏魚腩部隊，其中艾桑巴朗加2次都取得入球，呢場對住闊別英冠超過10多年嘅盧頓，米堡要搶分冇難度，平手盤揀米杜士堡。

撐飛腳颶風隊吼半和
講到日職神戶勝利船主場鬥大阪飛腳，勝利船慘遭聯賽3連敗，就算新兵華美倫出得都難走出低谷，今場仲要讓波，寧捧讓球客勝。

（有線602及662台周五晚6時直播）

周六早上颶風隊主場同高隆上演阿甲獨腳戲，颶風隊上仗成功以0比0守和勁旅小保加，呢場隨時照辦煮碗，吼半和。

（周六早上8時開賽，馬會網上文字直播）