今晚日職爆發傳統大戰，「9哥」浦和紅鑽於主場迎戰「4哥」鹿島鹿角。紅鑽一向有前冇後、打死罷就，今場隨時以攻為守，撞正近期火力全開嘅鹿角，勢必大駁火，2.5球嘅入球大有買趁早。
（有線662及602台周三晚6時30分直播）
紅鑽今季分心亞冠盃，喺聯賽僅列中游位置，近10場聯賽贏得3勝咁大把，贏嘅全屬聯賽尾6位嘅球隊，真係見到都唔開胃。由於紅鑽已殺入亞冠盃8強，今季目標非常清晰，聯賽只屬次要，甚至成為試陣嘅場合。紅鑽老牌箭頭興梠慎三近期頻有士哥，寶刀未老，可惜球隊防線唔太穩陣，近8場聯賽合共失掉15球，其中5場開3球或以上，明顯係有前冇後。
興梠慎三火併森巴孖寶
鹿角雖有前鋒新星安部裕葵轉投巴塞隆拿，幸好森巴孖寶韋法臣李安度及沙真奴安東尼奧及時交到貨，前者喺上場聯賽贏鳥棲砂岩2比1之役，交出入波兼助攻，兼且打破近3個月入球荒，中場沙真奴安東尼奧近5場聯賽亦入3粒，配合土炮前鋒金森健志等開路，鋒力強勁。連同盃賽在內，鹿角近6場取得4勝1和1負，共轟15球，但只得2場冇失波，其中5場開3球或以上，今仗造訪死敵唔會玩死守，捧2.5球嘅大盤最上算。
