一年一度嘅季前熱身賽──酋長盃今晚開打，阿仙奴主場硬撼里昂。兵工廠有新兵丹尼施巴路斯啱啱入「廠」，今仗隨時處子登場，配合「雙響炮」拿卡錫迪同奧巴美揚，火力全開，佢哋防線一向唔穩陣，與同樣嗜攻嘅里昂隨時合演入球騷，3/3.5球大盤有買趁早。

（周日晚10時15分開賽，馬會網上文字直播）

施巴路斯首騷爭表現
阿仙奴之前赴美集訓表現唔錯，連同國冠盃在內，近4仗於法定時間取得3勝1和，無論係箭頭拿卡錫迪、奧巴美揚，抑或尼基迪亞、韋洛克等生牯仔都有入波。除此之外，兵工廠啱啱成功借得皇馬中場丹尼施巴路斯，呢位之前兩屆U21歐國盃帶領西班牙贏得一冠一亞嘅功臣，扭得傳得兼射得，可惜被皇馬放埋一邊投閒置散，如果今仗佢處子落場，必定騷哥利證明自己。至於日前受到刀匪襲擊嘅奧斯爾同哥拉辛拿斯亦無大礙，隨時落場狂攻對手，更添入波本錢。

不過，阿仙奴仍未解決防守老問題，好似上仗對皇馬領先兩粒下，又畀對手喺法定時間內追和，最終互射12碼輸埋，唔好賴中堅柏柏斯達夫普路斯被逐，人哋嘅拿祖費南迪斯同樣做「紅牌阿姑」，10打10咁都保唔住勝果，防線堅係脆弱 。

里昂雖有費基亞及尼當比利離隊，但補入泰亞高文迪斯及尤索夫干尼，實力仍有保證，不過佢哋連續兩場熱身賽輸波，包括以3比4不敵熱拿亞，全開3球或以上，明顯係入得又失得，今仗必定與阿仙奴對攻，捧大盤最划算。