4連勝弗到漏油
今日黃昏日乙直播戲碼，「7哥」甲府風林主場迎戰「6哥」岡山綠雉。睇牌面雙方似乎勢均力敵，但綠雉已連贏4場弗到漏油，仲有得受讓咁筍，讓球客勝不容錯過。
（有線604及603台周六下午5時直播）
兩季前仍喺日職打滾嘅甲府風林，雖然季前被視為升班熱門之一，不過近期表現差強人意，近4場聯賽只取得1勝3負，依家落後「1哥」京都不死鳥7分，想保住直接升班機會，實在不容再失。可惜風林近7次出戰聯賽，只有1場成功保持清白之身，其餘6場合共失掉12球，防線甩漏甚多，加上有金園英學、田中佑昌因傷上陣成疑，加埋近日有颱風逼近，場波可能變成雨戰仲惡踢，風林即使主場出擊亦冇太大勝算。
爭升班冇得保留
相反，季前唔被睇好嘅岡山綠雉，雖有哈迪法耶達、阿部海大、福元友哉等5件受傷患困擾，但近期表現愈戰愈勇，近10場聯賽取得6勝3和1負，不敗率高達9成。如果連埋日皇盃賽事在內，岡山綠雉更已累積4連勝，就算單計作客，近6仗只係輸過1場咁大把，真係士氣、信心返晒嚟，為爭取升班資格，今場一定搏甩髀，仲有得受讓必捧讓球客勝。
