開鑼在即搶頭威
象徵新球季展開嘅荷蘭超級盃周日淩晨一觸即發，上季雙料冠軍阿積士將於主場同聯賽「2哥」燕豪芬一決高下。兩大班霸新季都有唔少攻擊好手加盟，加上近年交鋒頻演入球騷，為咗喺新賽季開靚個頭，相信兩隊會上演鬥攻激戰，入球大值得留意。

（周日凌晨零時開賽）

由於阿積士包攬上季荷甲同荷蘭盃兩大錦標，所以燕豪芬得以用聯賽亞軍身份出戰今屆荷超盃。燕豪芬喺剛過去周中歐聯外圍賽第2圈首回合以3比2勝巴素利，不過球隊喺主場兼領先1球情況下，曾經連失兩球一度落後1比2，全憑唐耶爾馬倫同新兵森姆林馬斯完場前兩分鐘內連建兩功，先至險勝對手，球隊攻強守弱情況令人關注。

阿積士上季踢出青春火花，榮膺本土雙冠王，歐聯亦殺入4強階段，兩大主力中場法蘭基迪莊同中堅馬菲斯迪歷特旋即獲豪門睇中離隊，中後場實力難免削弱，好彩幾位盛傳被列強睇中嘅中前場好手，包括大衞拿尼斯、雲迪碧克及薛耶治暫時仲留隊，配合由西維爾來投嘅荷蘭國腳昆斯普美斯，進攻火力得以保持。

近年交鋒例演入球騷
睇番往績，雙方近4次交鋒各贏兩場，可謂勢均力敵，值得留意係彼此每場比賽都能喺對方身上轟入3球或以上，包括上季聯賽次循環阿積士主場贏3比1，今場入球騷睇怕走唔甩，中位數調到3/3.5球唔怕辣，照撐大盤。