聽朝早上美職上演多場大戰，其中芝加哥火燄主場硬撼華盛頓聯隊。火燄今季表現繼續低迷，加上陣中多位主力有傷上陣成疑，難有本錢搶分；華盛頓聯近期頻頻失分，趁朗尼休假後回歸必搶3分鞏固前列位置，受讓必捧讓球客勝。（myTV Gold 301、Now 638、有線614及654台周日早上8時直播）

火燄勢頹 小豬獨力難支
上季以東岸倒數第2成績收咧嘅火燄，今季繼續於下游徘徊，表現毫無改善，計埋上仗美墨聯賽盃0比2不敵藍十字，球隊近5仗未贏過，最叻都只係打和同屬下游分子嘅哥倫布機員，狀態麻麻，加上塞爾維亞中場卡泰爾同阿根廷射手奧斯華度加坦近期受傷患困擾，今場大有機會繼續倦勤，34歲德國老將「小豬」舒韋恩史迪加獨力撐唔起成隊波，前景只可用黯淡嚟形容。

現時排東岸第3嘅華盛頓聯雖然剛於熱身賽以1比8慘敗畀馬賽，不過嗰場冇派出最佳陣容應戰，擺明留力聯賽衝擊季後賽席位。當中前鋒朗尼仲獲批休假，返英格蘭同家人短敍。呢位今季射入11球嘅首席射手，已經叉足電返歸報到，今場可望候命殺敵，有佢拍住美國國腳保羅阿利奧拿，華盛頓聯火力全開，讓球客勝好路。