周六早上國冠盃上演「馬德里打吡」，皇家馬德里同馬德里體育會喺美國新澤西相遇。處於重建階段嘅皇馬，雖然有夏薩特和盧卡祖域等好手加盟，不過磨合需時，面對向來難纏嘅同市死敵馬體會，皇馬想贏唔容易，吼實讓球客勝。
（MyTV Gold及無綫85台周六早上7時30分直播）
上季戰績令人失望嘅皇馬，喺施丹重執教鞭後全面重整，新季獲夏薩特同盧卡祖域等重量級球星加盟，戰力可望重新評估。不過呢幾位新兵需要時間融入，近兩場國冠盃所見，皇馬無論對住拜仁或阿仙奴，球員之間嘅默契同狀態都未達十足，只靠個人能力同對手抗衡，想改善都要時間，短期內難望「銀河戰艦」能夠發揮出100%潛力。
近6次對賽僅1敗
馬德里體育會喺鐵血主帥施蒙尼帶領下，踢法向來以硬淨見稱，為填補高甸同桑法蘭托里斯等老臣子離隊後留下嘅空缺，馬體會近期都落足重本引入馬里奧靴莫素同捷比亞等後防猛將，成功補充防線實力。賽事另一焦點落喺倒戈相向嘅馬高斯洛蘭迪身上，呢位24歲中場悍將過往喺皇馬鮮有上陣機會，為求出路只有離隊他投。雖然佢上仗對瓜達拉哈拉領紅被逐，不過據西班牙媒體報道，馬體會為咗令佢唔好錯過今場大戰，已經成功幫佢打甩停賽處分，有呢位悍將做掃蕩工作，「床單軍團」嘅後防所受壓力都少好多。再者馬體會近6次對住皇馬，法定時間獲1勝4和1敗成績，不敗率達83%，今場讓球客勝值得支持。
