近6仗全勝狀態撻着
今晚喺上海舉行嘅國冠盃爆發英超內訌，由熱刺硬撼曼聯。兩軍對慣對熟，熱刺射手哈利卡尼上晒力，上仗轟入超靚半場笠射堅搶鏡；紅魔熱身賽3連勝，前鋒新星格連活特頻有士哥乘勢彈起，鬥攻格局捧中位數2.5/3球大盤冇衰。
（myTV Gold及無綫85台周四晚7時30分直播）
上屆歐聯亞軍熱刺，日前喺國冠盃對戰祖雲達斯，先係佢哋今夏首場熱身賽，勢估唔到即刻入局，憑拉美拿、盧卡斯莫拉及哈利卡尼各建一功反勝3比2，其中「哈神」完場前於中圈位置果斷起腳，笠死施捷斯尼上演絕殺，堅精彩，證明呢位英格蘭射手狀態唔錯，而新兵尼當比利亦交出助攻，令熱刺攻力進一步提升，不過門神洛里斯因扁桃腺炎已返回英國休養，令熱刺防線存在隱憂，但遇上老對手曼聯，相信熱刺唔會後退，實行以攻代守。
格連活特蘇B新寵
相比只踢咗1場比賽嘅熱刺，曼聯今夏已經踢咗3場熱身賽，結果全部贏晒轟入7球兼保持不失，包括首場國冠盃以1比0力克國際米蘭。或者已摸清原班球員實力，因此主帥蘇斯克查喺季前比賽致力提拔新人，包括「爆炸頭」鍾達希、丹尼爾占士及格連活特喺近仗都獲得唔少上陣機會，其中格連活特更加連續2場有士哥，被一眾曼聯球迷寄予厚望。呢位中場出身、依家轉型踢前鋒嘅新仔，可踢中前場多個位置堅全面，現已成為「蘇B」新寵，連同近3仗入2粒弗到爆嘅「福仔」拉舒福特，曼聯攻擊力不容小覷，再加上熱刺近7場國冠盃，有6次開出3球或以上，捧入球大更上算。
