馬菲斯迪歷特鞏固防線
周三晚上國冠盃焦點戰，祖雲達斯喺南京鬥國際米蘭。國米主力前鋒莫路伊卡迪決意他投，今次未有隨隊征戰，對球隊前場攻力肯定有影響，況且祖記後防獲馬菲斯迪歷特加盟後進一步加強，今場戰況隨時陷入膠着，中位數2.5球入球細值博。
（myTV Gold周三晚7時30分直播）
祖雲達斯季前不斷增兵，新球季肯定志在包攬意甲同歐聯兩大冠軍，繼艾朗藍斯、拉比奧特等實力猛將來投之後，早前「老婦人」仲完成重磅收購，引入荷蘭後防新星馬菲斯迪歷特。呢位年僅19歲嘅前阿積士隊長，上季帶領荷甲勁旅闖入歐聯4強，大將之風表露無遺。隨住巴沙利退役，基亞連尼同邦路斯又日漸老去，「老婦人」防線急需新血，年輕嘅馬菲斯迪歷特絕對是穩固後防嘅最佳人選。
國米莫路伊卡迪冇隨軍
國米前鋒莫路伊卡迪未有隨隊出戰國冠盃，主帥早前亦已經講到明下季球隊陣容唔會有佢嘅位置，意味着阿根廷人長達6季嘅國米生涯好大機會將告一段落。加上另一阿根廷國家隊鋒將拿達路馬天尼斯踢完美洲盃後未歸隊，國米陣中根本冇值得信賴嘅前鋒可用，上場面對曼聯以0比1落敗，便是最佳例證。好彩新加盟嘅烏拉圭鐵衞高甸已經同球隊會合 ，今仗隨時候命，靠鐵血防守仲有力同祖記一拚。兩軍近5次交手，有4次開2球或以下，可見兩強相遇入球唔會多，呢場一於吼實中位數2.5球入球細。
