穩陣派高手過招
女世盃8強矚目大戰，主辦國法國女足火併美國女足，兩軍分別為4.1倍及2.45倍奪標次熱及大熱，一場過淘汰賽高手過招當然步步為營。事實上，衞冕嘅美國女足大賽經驗豐富留放得宜，近5場出戰女世盃淘汰賽有4次開半場和，值得再追。
（有線603及604台周六凌晨3時直播）
法國半場旺窿窿
美國女足今屆演出盡顯3屆冠軍本色，分組賽3戰全勝狂轟18球，打破歷屆分組賽最多入球紀錄，上場憑老將娜賓露包辦2球12碼，以2比1淘汰西班牙，強勢進身8強。美國歷來出戰女世盃至少都能打入4強，應付淘汰賽可謂駕輕就熟，連同上屆比賽，佢哋近5場女世盃淘汰賽有4次開半和，踢法非常謹慎，留放有道。
坐擁主場之利嘅法國女足於A組3戰全勝首名晉級，上圈16強踢至加時以2比1踢走巴西，不過佢哋踢法唔算特別進取，除咗首場以4比0大勝實力較弱嘅南韓女足，其餘3仗上半場皆守和對手0比0，留待換邊後先發力，今次面對實力頂班嘅奪標大熱美國，相信更加唔會貿貿然搶攻，先做好防守再等候反擊機會，半場和高唱入雲。
