4大射手級數非凡
周日凌晨美洲盃最後1場8強大戰，烏拉圭火併秘魯。烏拉圭有蘇亞雷斯同卡雲尼兩大世界級前鋒壓陣，前場火力有保證，相反秘魯後防漏洞明顯，呢場想挑戰強敵惟有以攻代守，兩軍鬥攻格入波唔會少，中位數2.5球入球大好路。

（Now 650及Now E周日凌晨3時直播）

哨牙蘇卡雲尼風頭勁
烏拉圭作為歷來贏得美洲盃冠軍次數最多球隊（15次），陣中主力「哨牙蘇」蘇亞雷斯、卡雲尼同高甸征戰多年，大賽經驗豐富，賽前已被視為今屆爭標分子之一。球隊於C組以2勝1和成績首名出線，其中前場兩位主力射手各自斬獲2球，搶盡風頭。不過睇真啲，烏拉圭次輪面對日本於2度落後下險和對手2比2，上場面對智利亦僅憑卡雲尼完場前入波小勝1球，表現略嫌飄忽，話晒上述3名骨幹成員都已年過30，體能肯定不及當年，呢場烏拉圭雖然牌面上佔優，不過由班老將擔大旗，想輕取秘魯絕對唔易。

古里路法芬經驗豐富
秘魯上場分組賽以0比5慘敗畀巴西，只能以小組第3名出線，呢場無可避免被看淡，不過秘魯對上3屆美洲盃有2次能夠進身4強，表現實而不華，而且前鋒荷西古里路同中場法芬等主力經驗豐富，有力帶領擅踢整體戰嘅秘魯全力一拚。秘魯近4次於烏拉圭交手雖然只得1勝3負，但當中只有1次未能取得入球，3次總入球開3球或以上，今場未必會消極死守，中位數2.5球入球大值得留意。