女子世盃今晚上演最後2場8強大戰，頭場先有意大利女足鬥荷蘭女足。論搶鏡程度，今屆4戰全勝嘅荷蘭無疑較優勝，不過睇番荷蘭4場比賽都係下半場中後段入波先奠定勝果，連續4場開出半場和，表現慢熱；意大利同男子隊一樣作風保守，比賽初段亦唔會過分搶攻。有一點值得留意，雙方之前4場比賽對手都唔係歐洲球隊，今次遇上風格接近嘅對手相信會更小心，首選半場和。

（有線603及604台周六晚9時直播）

德國往績食住瑞典
至於尾場則由德國女足硬撼瑞典女足。德國分組賽表現雖然唔及另一支奪標熱門美國大炒對手13球咁有霸氣，不過卻貫徹咗「日耳曼民族」嘅穩健作風，由頭2場以1球小勝中國及西班牙開始，到之後加埋派咗7蛋畀2支非洲代表南非及尼日利亞，狀態持續冒升，而且德國係今屆唯一一支冇失過波球隊，穩健防線絕對係爭標最大本錢。瑞典論實力喺女足界亦係數一數二，不過自從王牌舒蓮退役後，瑞典對住一線強隊經常處下風，例如今屆分組賽就曾經淨吞美國2蛋，而且瑞典近5次鬥德國只得1和4負，包括上屆於16強大敗1比4，今次想復仇唔係話咁易，德國讓半一波童捧上盤。

（有線603及604台周日凌晨零時30分直播）