周二凌晨北歐波連場激戰，阿King度咗條心水過關畀大家，重心瑞典超佐加頓斯主場迎戰卡爾馬，佐加頓斯近期走勢强勁，為追趕1哥馬模，呢場波肯定會繼續踩油搶3分，況且對手卡爾馬作客表現麻麻，一於捧主勝。

（周二凌晨1時開賽）

上季聯賽僅排第7嘅佐加頓斯，今季表現脫胎換骨，近期聯賽豪取4連勝，目前12戰積24分排積分榜次席，落後榜首馬模6分但踢少一場；球隊今季引入塞拉利昂箭頭穆罕默德杜雷爾，此子發揮對辦，單計聯賽已有5球進帳，成功加强佐加頓斯攻擊力，加上有中場猛將拿迪特甸納停賽後復出，火力大增，今場面對近4聯賽作客未贏過嘅卡爾馬，估計贏波冇難度。

薩普斯堡心雄玩鋪大
同時間開波嘅赫根主場對哈馬比，赫根主力阿密特耶仙坐完波監今場復出，攻力有保證，面對有後防主力西蒙辛特貝治停賽嘅哈馬比，隨時入多幾粒，入球大好路。

另一關係挪超，薩普斯堡主場同史卓加斯特上演下游大戰，薩普斯堡上仗聯賽主場爆冷擊敗前列分子奧特足球會，接着又作客逼和另一勁旅華拉倫加，球隊遇強連取4分士氣大振，今仗回師主場肯定心雄搶攻，而4連敗的史卓加斯特亦力求止血，肯定同你搏命，入球大捧得過。