周二凌晨非洲盃分組賽最後一輪對決，D組南非將會硬撼摩洛哥。摩洛哥小組頭2輪贏晒兼未過1球，已經提前出線，對住攞多1分亦有機會以最佳第3名身份晉級嘅南非，摩洛哥只要保持穩健嘅防守表現，對手攻力麻麻根本唔會有機會製造到威脅，半場和值得留意。

摩洛哥作為2018世盃決賽周分子，陣中人腳實力絕對有番咁上下級數，其中後防多位主力都有歐洲頂級聯賽嘅揾食經驗，除咗曾經效力祖雲達斯嘅隊長貝拿迪亞之外，耶辛尼保奴上季作為基羅納主力門將，喺西甲賽場都有神勇表現，加上有阿舒拉夫同馬沙拉奧鎮守左右兩閘，令球隊可以立足於不敗之地。摩洛哥能夠提早鎖定16強席位，同呢班防線猛將表現出色有好大關係。可惜進攻效率就有待改進，原本應該擔大旗嘅阿積士球星薛耶治，喺國家隊踢法過於獨食，未能發揮出最佳水準。

現時3分在手嘅南非，雖然贏波就可以首名晉級，不過佢哋都應該意識到自己實力同摩洛哥實在有差距，假如一味搶攻未果仲畀摩洛哥贏番轉頭，隨時落得輸波提早執包袱嘅下場。所以呢場相信都會審慎行事，況且球隊近2仗半場都同對手打和，半場隨時難分高下。