4強夢幻星戰
美洲國家盃周三早上爆發4強激戰，東道主巴西火併宿敵阿根廷。呢場雖然係大家期待已久嘅夢幻對決及冠軍前哨戰，不過睇番今屆4場8強竟然有3場開出0比0，便知嚟到淘汰賽始終都係防守當道，更何況，雙方近5次交手有4次總入球開2球或以下，高手過招相信入波唔會多，波童推介2.5球入球細。（Now 650及Now E周三早上8時30分直播）

主辦國巴西今屆賽前有尼馬因傷退隊，雖然菲臘比古天奴、羅拔圖法明奴及艾華頓索拉斯等鋒將發揮唔錯，不過上場對住一心死守嘅巴拉圭又死火，最終要靠互射12碼勝出晉級，水準唔算太穩定，由於早前於熱身賽有好表現嘅愛華頓前鋒李察利臣上場賽前染病已退隊，令到前線變陣本錢更少。好彩巴西今屆後防表現出現，連續4場比賽都冇失波，既然現時球隊欠缺破關板斧，來到4強相信會踢得更加謹慎。

阿根廷今屆分組賽表現慢熱，好彩去到8強終於踢出強者本色，憑拿達路馬天尼斯及盧施素入波以2比0擊敗委內瑞拉，亦係8強唯一一支可以喺法定時間之內入波兼獲勝嘅球隊。馬天尼斯連續2場有波入，應可進一步確立正選席位，而且後防經過連續4場起用唔同配搭後，以呢場表現最能畀到球迷穩健信心，當中效力熱刺嘅祖安科夫連續2場擔正，阿根廷都能保持不失球贏波，相信呢位21歲小將可以填補奧達文迪年紀漸大、速度較慢嘅不足。

近5次碰頭4場開細
巴西、阿根廷作為南美足球兩大龍頭，每次交鋒都話題性十足，不過由於2軍近年成績未算突出，加上尼馬、美斯等巨星代表國家隊亦欠缺佳作，故此近年交鋒甚少出現大手交易，近5次碰頭就有4次總入球開2球或以下，而且今屆美洲盃4場8強同樣全開2球或以下，當中3場更踢成0比0，相信今場會延續入波偏少嘅走勢，一於再追入球細。