今晚女世盃4強開打，英格蘭女足要火併衞冕冠軍兼3屆盟主美國女足。英格蘭女足連場報捷，信心爆棚，就算對住強隊都未驚過，「美女」初段會先求穩陣，謀定而後動，加上近4次交手全開半場和，不妨追多鋪。

（香港開電視77台、有線604及603台周三凌晨3時直播）

雙方都係今屆女世盃長勝之師，英格蘭女足自首場2比1擊敗蘇格蘭女足後，連贏4場不失1球，當中近2場淘汰賽先後以3比0大勝喀麥隆女足及挪威女足，信心、狀態返晒嚟，其中前鋒艾倫韋芝今屆已入5粒，連續兩屆殺入4強，遇強隊都冇有怕。

美國遇強以穩行先
美國女足今屆雖然打破歷來分組賽入球最高紀錄，不過喺近2場淘汰賽只能小勝西班牙女足及法國女足2比1，連續2場都有失波，防守唔算穩健，面對來勢洶洶嘅英格蘭女足，預料唔敢再大意，必定以穩行先。

翻查紀錄，兩軍近年交鋒互有勝負，不過大部分比賽喺下半場先分出勝負，連開4次半場和，加上踏入淘汰賽階段，距離決賽只差一步，為免一失足成千古恨，相信雙方於初段會穩打穩紮，睇準機會先發難，咁蹺佢哋喺上屆4強分戰日本女足及德國女足，同樣開半場和，值得再追。