周中波都咁熾熱，阿King當然有好介紹啦！女子世界盃4強荷蘭女足對瑞典女足有免費直播，荷蘭女足於今屆女世盃5戰全勝，以阿仙奴女足孖寶美迪瑪及雲迪當克為首的鋒線，於今屆5戰中有4場至少轟入對手2球，火力相當可靠。瑞典女足上場於劣勢下爆冷淘汰德國女足，表現的確不俗；荷蘭女足相信都會投鼠忌器，唔會掉以輕心，加上荷蘭女足今屆賽事5場全部開半場和，半場和係過關穩膽。

（香港開電視77台、有線603及604台周四凌晨3時直播）

至於周四朝早美洲金盃亦有4強大戰，東道主美國火併牙買加。美國貴為今屆主辦國之一，分組賽至今4戰全勝入12球兼0失球，表現盡顯霸氣，除了有經驗老將如米高巴特利、艾迪杜里等孭飛，新世代如基斯甸普列錫、韋斯頓麥堅尼亦證明具備足夠實力可以擔大旗，未有出現斷層問題。牙買加對上2屆皆能殺入金盃決賽，可惜連續2屆都屈居亞軍，其中上屆便是以1比2不敵今場對手美國，牙買加雖然都係主辦國之一，但美國今場有主場之利，加上整個賽事嘅霸氣，辣讓一球/球半，照捧上盤。

火燄沉淪捧對家
最後講埋場美職芝加哥火燄主場對阿特蘭大聯，火燄自5月19日對聖荷西地震輸波開始，累積6場未贏過，阿特蘭大聯作客有個特別數據，近10場非贏即輸，如果信火燄繼續沉落去，不妨大膽扒冷，博阿特蘭大聯客Ｗ，有3.25倍幾過癮！

（myTV Gold 301、Now 638、有線614及654台周四早上8時直播）