聽朝繼續有美職開快車，阿King最有心水係尾場洛杉磯銀河主場迎戰FC多倫多。銀河王牌伊巴謙莫域腳風唔多順，令戰績飄忽不定，撞正剋星FC多倫多必冇啖好食，仲要讓波咪掂，轉捧讓球客勝。

（myTV Gold 301、Now 638、有線654及614台周五早上10時30分直播）

伊巴謙莫域腳風唔順
東岸前列分子銀河，一向靠伊巴謙莫域搵食，但呢位瑞典神箭畢竟已經37歲，狀態有起伏亦人之常情，佢近6場有披甲賽事僅入兩粒，腳風麻麻，球隊亦只得3勝3負，可見伊巴弗唔弗，對銀河影響甚大。雖然FC多倫多只排東岸中游，但近況略有起色，近5仗取得1勝3和僅1敗，中場迪里安更有3球進帳，表現硬淨頂得兩嘴，加上雙方近3次交手，FC多倫多全部贏晒，仲有得受讓咁筍，讓球客勝咪錯過。

串達拉斯大急流上盤
至於早少少開波嘅FC達拉斯主場對華盛頓聯隊，同伊巴喺曼聯做過隊友嘅華聯箭頭朗尼，近4次上陣入4粒，仲係場場有波入勁弗，FC達拉斯主場出擊特別進取，近5次主場全開3球或以上，鬥攻格局捧2.5球嘅入球大。（myTV Gold 302、Now 639、有線655及615台周五早上9時直播）最後係同時間開波嘅科羅拉多急流主場對新英倫革命，急流近況唔錯，近8仗取得5勝3和未輸過，若果單計主場聯賽，近4場全部贏晒，面對作客麻麻嘅革命，可食住個勢再下一城，小讓平半可捧上盤。