防線硬淨唔易輸
美洲國家盃周日凌晨上演季軍戰，阿根廷同智利將會連續第3屆喺美洲盃交鋒。阿根廷對上2屆喺決賽射輸12碼畀智利，換來「亞軍廷」污名，更弊喺今場仲有中前場兩大悍將停賽，要喺硬淨嘅智利身上贏番次唔係話咁易，讓球主客和阿根廷讓一球，波童捧1.9倍智利讓球客勝。

（Now 650及Now E周日凌晨3時直播）

正所謂「不是冤家不聚頭」，阿根廷同智利原本有機會連續3屆喺美洲盃決賽交鋒，點知阿根廷4強畀「死敵」兼東道主巴西淘汰，至於智利更爆冷淨吞秘魯3蛋，兩軍同樣未能躋身決賽，搞到今屆喺季軍戰又試碰頭。

阿根廷焗變陣未必Keep到
睇番阿根廷對上兩場淘汰賽表現，的確比分組賽時有所進步。可惜呢支「潘帕斯雄鷹」今仗缺少兩位肯跑肯撲嘅球員，今屆賽事入咗兩球、近兩場擔正嘅前鋒拿達路馬天尼斯累積黃牌夠數坐波監，冇咗佢喺前線衝鋒陷陣，阿古路及美斯嘅威脅隨時大減，另外中場助攻助守嘅馬高斯阿古拿亦要停賽，主帥史卡朗尼焗住變陣，未必可以踢番對上兩場嘅水準。

對上兩屆盟主智利情況剛好同阿根廷相反，踏入淘汰賽後連續兩場冇波入，表現比分組賽失色，搞到衞冕失敗。不過智利踢法勝在夠硬淨，強如哥倫比亞喺8強都咬唔入佢哋，就知智利一條後防線相當難應付，就算贏唔到都唔易輸。

智利對上兩屆都能守和阿根廷，以後者目前狀態同表現真係冇咩本錢讓波，讓球客勝值得支持。