東道主迎擊巨人殺手
美洲國家盃今夜爆發王者之戰，由東道主巴西再遇奇兵秘魯爭冠。「森巴兵團」今屆分組賽曾豪贈秘魯5蛋，實被睇高一線，不過秘魯連續砌低2支前度冠軍烏拉圭同智利，士氣、信心爆晒棚；加上兩軍近年交手，經常大手交易，今仗隨時同演入球騷，2.5球嘅大盤有買趁早。

（Now 650周一凌晨4時直播）

巴西前線火力全開
巴西上場4強以2比0擊退宿敵阿根廷，今屆5戰保持零失球，兩大射手羅拔圖法明奴、「耶穌仔」加比爾捷西斯喺呢場互相助攻對方建功，逐漸培養出默契，「耶穌仔」上仗及時入波，有助重拾信心。法明奴喺分組賽對秘魯亦攻入1粒，協助巴西大勝5比0，況且佢同前紅軍拍檔菲臘比古天奴夾慣夾熟，連同今屆爆出嘅艾華頓索拉斯，火力全開，為重奪失落12年嘅美洲盃，必藉主場之利狂攻秘魯。

秘魯冇包袱玩對攻
「巨人殺手」秘魯，雖曾喺分組賽慘吞巴西5蛋，不過踏入淘汰賽後愈戰愈勇，先喺8強踢走2011年冠軍烏拉圭，4強再大勝近兩屆盟主智利3比0，表現脫胎換骨。秘魯對上一次打入美洲盃決賽已經係1975年，嗰次亦係佢哋第2次捧美洲盃，今次再入決賽已超額完成，壓力比起東道主巴西細得多，冇心理包袱下隨時同對手鬥攻，2.5球嘅大盤捧得過。