文尼當弗雷恩孖寶支援
今晚非洲國家盃8強揭開戰幔，打頭陣塞內加爾硬撼貝寧。塞內加爾有利物浦射手沙迪奧文尼助陣，火力全開，貝寧今屆4場法定時間未贏過，上輪都係靠射贏12碼先晉級，消耗巨大回唔切氣，加上近年對賽畀塞軍食住，讓球盤塞內加爾讓一球冇有怕，照捧上盤。

（myTV Gold 301、Now 638、有線654及614台周四凌晨零時直播）

塞內加爾今屆表現對辦，除分組賽次輪以0比1不敵阿爾及利亞外，其餘3場全部贏波兼冇失球，攻守兼備。表現最搶鏡嘅梗係王牌沙迪奧文尼，儘管呢位「紅軍」前鋒連續兩場射失12碼，不過都仲有3球進帳，延續喺球會嘅弗爆狀態，佢身邊仲有雷恩孖寶麥巴耶尼安及伊斯美拿沙亞支援，火力堅勁。

貝寧能夠躋身8強階段極為好彩，分組賽連和3場勉強出到線，及後16強同摩洛哥打和1比1之際，對手薛耶治喺補時操刀極刑宴客死過翻生，激戰至加時仍未分高下，貝寧最終互射12碼贏波過關，可惜搏到咁盡難以回氣，加上後衞艾迪隆今場要停賽，更難望偷到雞。兩軍近3次交手，塞內加爾全部贏晒，讓球盤讓一球照捧上盤。

南非穩陣波半和「尼」料
夜少少開波嘅另一場8強戰，「超霸鷹」尼日利亞火併奇兵南非。尼日利亞喺今屆非國盃4戰3勝1負，演出醒神。不過「超霸鷹」面對死守球隊經常老鼠拉龜，分組賽頭兩輪對布隆迪及畿內亞，都要踢到下半場先打破悶局。今場對手南非正係守強攻弱球隊，佢哋16強面對東道主埃及大擺鐵桶陣，最終戰至末段偷襲得手爆冷贏1比0，今屆4戰全部開半場和，可見踢法以穩行先，預計今仗初段會繼續玩拉布，令「超霸鷹」陷於苦戰，半場和值得追多鋪。

（myTV Gold 302、Now 639、有線655及615台周四凌晨3時直播）