阿仙奴隊長臨陣作反
聽朝國冠盃北美站爆發重頭戲，阿仙奴喺中立場加州尊嚴健康球場火併拜仁慕尼黑。阿仙奴雖然日前熱身賽贏波，但隊長哥斯尼竟喺臨出發前拒絕赴美，影響軍心，相反拜仁精銳盡出，近年交手又食住「兵工廠」，今場有力旗開得勝，拜仁W捧得過。

(myTV Gold周四早上11時直播)

阿仙奴今夏預算有限，增兵冇乜進展，近日更發生「兵變」，隊長哥斯尼疑因減人工兼轉會不遂，拒絕隨隊參與季前美國之旅，呢位前法國國腳係陣中嘅老大哥，今次竟帶頭作反勢必打擊士氣。雖然「兵工廠」仍有拿卡錫迪、奧巴美揚、奧斯爾助陣，並喺日前熱身賽輕取科羅拉多急流3粒，但中場伊禾比、古安杜斯及盧卡斯托拉拿，因踢太公波或仍在休假而缺陣，實力打折扣。

基拿比倒戈必搏盡
相反，拜仁除咗艾方素戴維斯及新加盟的盧卡斯靴南迪斯缺席外，羅拔利雲度夫斯基、基拿比、湯馬士梅拿及新兵班捷文柏華特均有隨隊，其中昔日畀阿仙奴放棄嘅基拿比，今仗倒戈一定加多兩錢肉緊證明自己。何況阿仙奴一向係拜仁嘅「私房菜」，兩軍近4次交手，法定時間內拜仁取得3勝1和，更狂轟16粒，明顯格食格喇，要贏「兵工廠」響頭炮冇難度，客勝有買趁早。