英超鬥到非洲馬列斯食住文尼
非國盃今晚由塞內加爾同阿爾及利亞上演王者之戰。兩軍今屆喺分組賽碰過頭，當時阿爾及利亞小勝1比0，保持近5次交手4勝1和未輸過；塞內加爾防守主力高列巴尼今仗停賽，此消彼長下，平手盤必捧阿爾及利亞！

（myTV Gold 301、Now 638、有線614及654台周六凌晨3時直播）

講到決賽雙雄，焦點當然係兩大孭飛球星沙迪奧文尼及馬列斯。馬列斯效力嘅曼城上季喺英超力壓文尼嘅利物浦封王，今次咁啱又係兩人正面對決。兩位喺今屆比賽同樣轟入3球，不過文尼喺今屆比賽兩度射失12碼，連帶上場代替佢做劊子手嘅沙維特都宴客，整體信心或受影響。相反馬列斯上場補時階段轟入靚罰球，帶領阿軍2比1擊敗尼日利亞，論腳風似乎馬列斯稍勝一籌。

塞內加爾缺高列巴尼影響大
今場兩隊後防亦可能成為勝負分野，事關塞內加爾中堅高列巴尼攞夠黃牌要停賽，呢名受到多支豪門垂青嘅拿玻里中堅，今屆場場踢足，協助塞軍喺6場比賽有5場冇失波，唯一失球正正就係分組賽畀阿爾及利亞射入，決賽關頭先冇咗佢都咪話唔驚。阿爾及利亞防守數據雖然冇塞軍咁好，不過今屆6場比賽亦僅失2球，其中1球係12碼，硬淨程度毫不輸蝕。況且塞內加爾4強要踢足120分鐘先淘汰突尼西亞，體力或較輸蝕。既然阿爾及利亞係今屆唯一一支可以喺塞內加爾身上入到波嘅球隊，今場仲要撞正對手缺後防大將，平手盤必捧阿爾及利亞。