攻強守弱未改善
周六日職連場大戰，3場直播戲碼以神戶勝利船主場迎戰橫濱水手最矚目。水手近期狀態大勇，已進佔聯賽榜次席，可惜作客表現欠缺穩定性，今仗爭勝有隱憂；勝利船近5場入13球失10球，有4場總入球開4球或以上，攻強守弱缺點仍未改善，今場一於進取啲揀3.5球入球大。

（有線602及662台周六下午5時直播）

水手作客易失波
橫濱水手近況唔曳，聯賽連盃賽近5場錄得4捷，不過呢4場勝仗都係嚟自主場，如果單計作客佢哋已經連輸兩場，加埋一共失咗7球之多。睇番佢哋今季踢咗19場聯賽失25球，失球數字係聯賽前8名入面最多一隊，就算現時聯賽排名高過勝利船，作客想攞3分充滿阻力。

神戶勝利船今季經歷兩次換帥，由德國教頭芬克接手後曾經歷短暫蜜月期，不過球隊對上兩場聯賽先後不敵清水心跳及湘南比馬，走勢顯著回落，好彩佢哋主場出擊攻力唔錯，近3場共轟入11球，當中西班牙孖寶韋拿及恩尼斯達包辦咗當中6球，但後防表現就令人失望，近8次主場作賽，有7次未能保清白之身，絕對係攻強守弱。既然兩軍後防都有不少漏洞，今場甚有機會出現大手交易，不妨進取啲揀3.5球入球大。