小將搶韁曼城半場屠狼

今晚英超亞洲挑戰盃決賽，狼隊會同曼城喺上海一決勝負。「藍月亮」首戰唔使一班老大哥出手，單靠年輕小將打頭陣，半場已經輕輕鬆鬆領先韋斯咸，反映板櫈深度極為足夠，今場可望再下一城，半場客勝值得支持。

（Now 621周六晚7時30分直播）

曼城出戰今屆英超亞洲挑戰盃陣容堪稱星光熠熠，其中奇雲迪布尼、貝拿度施華同利萊辛尼等上季英超奪冠功臣全部都有隨隊，而史達寧上仗後備落場更梅開二度，幫助曼城4比1輕取韋斯咸躋身今晚決賽。不過比賽中令球迷留下深刻印象嘅，反而係一班正選上陣嘅小將，面對以主力陣容應戰嘅「錘仔幫」表現毫不怯場，其中祖安巴拿比同盧卡斯尼美查兩位青訓新星，就合力包辦球隊上半場兩個入波，呢班新仔為留低良好印像畀領隊哥迪奧拿，肯定更加落力，對住防守力一般嘅狼隊，有望再搶韁，半場客勝唔好錯過。

紐卡素立立亂難敵韋斯咸
早場季軍戰由紐卡素遇上韋斯咸。繼賓尼迪斯離隊後，「喜鵲」主力箭頭人物荷西朗頓都步「肥賓」後塵，離隊到中超搵食，加上早前轉會他投嘅艾約斯佩雷斯同祖斯盧辛馬田，紐卡素現時只剩日本前鋒武藤嘉紀可用，進攻質素難以保證。再者由上仗慘吞狼隊4蛋所見，紐卡素防線錯漏百出，睇怕招架唔到韋斯咸菲臘安達臣同蘭仙尼等進攻好手。就算新任領隊布魯士已飛抵上海親自督師，都幫唔到手，捧番客勝好過。

（Now 621周六下午5時直播）