夏世三降臨皇馬大鬥拜仁

聽朝國冠盃北美站爆重頭大戰，德甲班霸拜仁慕尼黑火併西甲豪門皇家馬德里。拜仁主帥尼高高華為挽回信心，志切大踢進攻足球；「銀河艦隊」則有「夏世三」夏薩特處子登場，近年交手例演入球騷，中位數3/3.5球入球大，有2.02倍不容錯過。

（無綫85台及myTV Gold周日早上8時直播）

尼高高華保命改踢進攻足球
拜仁上季保住德甲冠軍，但主帥尼高高華飽受批評，「罪名」包括戰術過於保守，無論高層、球員以至球迷，都希望拜仁踢出水銀瀉地嘅進攻足球，先配得上豪門稱號。隨着法國翼衞班捷文柏華特加盟，相信拜仁會借國冠盃演練進攻風格，首場國冠盃雖以1比2輸畀阿仙奴，但尼高高華大讚球隊進攻夠機動同速度，一定食住個勢繼續攻。

皇馬今夏大事增兵，最矚目新兵自然係夏薩特。呢位比利時國家隊隊長過去被喻為僅次美斯及C朗，乃「世界第三」，可惜近年車路士走下坡，阻礙「夏世三」發展，如今得償所願加盟皇馬，自然搏甩髀擔當進攻重心角色。其餘新兵如前鋒盧卡祖域、「日本美斯」久保建英等如果上陣亦會爭取表現。今場預計都係鬥攻格局，大盤可取。