新仔對辦前線重現活力
今晚喺新加坡上演嘅國冠盃有好戲碼，英超「紅魔」曼聯硬撼意甲國際米蘭。「紅魔」之前兩場熱身賽新人當道，表現有板有眼，前線重現活力，加上有保羅普巴同桑馬達等「大佬」壓陣，面對陣容不整嘅「藍黑兵團」，曼聯準備工夫同狀態都略勝一籌，1.95倍主勝唔好錯過。

（無綫85台及myTV Gold周六晚7時30分直播）

國際米蘭上季獲意甲第4名，嚟緊繼續有得踢歐聯，為咗更上一層樓，佢哋新季搵嚟干地執教，呢位意大利名帥大展拳腳，梗係希望引入自己心儀嘅球員，頭號目標係今仗對手曼聯前鋒盧卡古，不過會方認為盧卡古身價過高，令到成事機會不大，搞到干地對球會嘅轉會操作勁不滿。

國米陣容不整難有作為
除增兵遇阻帶外，國米上季首席射手莫路伊卡迪亦決心他投，今次並冇隨隊到亞洲，另一阿根廷射手拿達路馬天尼斯剛剛踢完美洲盃未歸隊，塞內加爾國腳基達巴爾迪又踢緊非國盃，鋒力可謂大打折扣，更何況後防新兵「鐵血中堅」高甸亦未同球隊會合，今仗陣容不整，想降「魔」恐怕有心無力。

誓要重振雄風嘅曼聯備戰新球季相當積極，除密密簽人外，亦踢咗兩場熱身賽，當中格連活特同新兵雲比沙卡均獲上陣機會，效果仲唔曳添，佢哋兩個上仗對列斯聯就合力炮製紅魔第一球入波，連同「新傑斯」丹尼爾占士，曼聯進攻重現久違嘅活力，搭住兩位中場「大佬」保羅普巴同桑馬達，新舊融合下有望擦出火花，主勝值博。