江原窮等人家捱打
由於財閥足球勢力太大，星期日韓職嗰場「二哥」火併「四哥」嘅大戰——蔚山現代主場對FC江原，即使客軍江原攻擊力唔差，但好難同「錢」對抗，1.65倍入球大抵玩。

（周日晚6時開賽）

如果純粹由實力去講，「二哥」蔚山現代中場非常強，有金甫炅、朴柱昊同埋剛剛續約嘅外援迪斯基路特，呢位被英超曼城外借去蔚山嘅28歲美國國腳，參加過2014年世界盃，今季韓職入咗3球，能攻擅守。前面又有巴西前鋒祖利亞尼加奧、金仁成、周敏圭幾個射得之人，係一支打法比較全面嘅球隊。

FC江原就好唔同，今季最初定位係護級，全靠幾支同級對手城南、濟州、仁川、慶南甚至浦項制鐵失準，先至突出重圍成為「四哥」，當然中前場趙宰桓、鄭祖國、金直勛、烏奧斯達歷幾個表現超乎預期確係事實，不過佢哋主打都係防守反擊，本質上依然屬於弱旅心態。

財閥效應吞聲忍氣
但係對江原最不利係韓職嘅財閥足球勢力，呢支由地方政府及江原道市民共同出資，屬於典型「市民球團」嘅球隊，今季只喺季初贏過全北汽車一支有財閥撐腰嘅球隊，其餘時間聯賽對親FC首爾、蔚山現代、水原藍翼呢啲有錢人家多數Win唔出。至慘烈係4月14日主場1比2輸畀首爾嗰場，首爾前鋒阿歷山大比錫喺23分鐘嘅入波，連旁證都舉旗示意越位，球證金泳佑睇埋VAR，照樣判入球有效，顯然就係一種財閥足球效應，江原主帥金秉秀事後都只能夠冷笑回應：「係咁樣o架啦，仲可以點樣？」

今場對手蔚山現代背後財團就係現代重工，呢間係世界上最大嘅造船公司，仲幫南韓海軍生產軍艦，財雄勢大，江原一介「布衣平民」，喺呢場涉及爭標嘅關鍵大戰，難免比較蝕底。只不過窮人都有尊嚴，江原一定會死砌，防線主力貝菲斯傷咗嘅蔚山，贏都難保唔失波。