C朗歸隊星洲演好戲
今晚國冠盃新加坡站重頭戲，祖雲達斯火併熱刺。祖記王牌基斯坦奴朗拿度（C朗）已經歸隊，連同艾朗藍斯、拉比奧特等新兵，實力大增。熱刺雖簽入「新普巴」尼當比利，但盛傳防線面臨大清洗，用新仔隨時失晒魂，加上兩軍近年碰頭常演入球騷，2.5球大盤有買趁早。

（myTV Gold及無綫85台周日晚7時30分直播）

藍斯拉比奧特添祖記活力
祖雲達斯今季改由沙利掌舵，呢名前車仔主帥崇尚以傳控為主嘅進攻足球，比起前任阿里基只識玩陣地戰毫無板斧，相信佢可充分發揮C朗嘅數胡能力。而要打出「沙利波」另一關鍵之處，就係要做好中前場壓迫，除咗原本已有嘅防中馬度迪、安利簡恩、基迪拉之外，今夏仲免費簽入艾朗藍斯同拉比奧特，兩人均屬體力充沛嘅Box to Box球員，有助加強中前場逼搶，以及轉守為攻嘅速度。剛加盟嘅貴價中堅馬菲斯迪歷特亦有隨隊，但未同隊友夾過，未必即刻有貨交。

尼當比利支援熱刺雙箭頭
另一邊廂，熱刺上季喺限米煮限飯之下，意外殺入歐聯決賽，飲恨只得亞軍亦屬超額完成，今夏終於肯大破慳囊，斥巨資羅致里昂中場尼當比利，呢名「新普巴」能攻善守，必屬連繫中前場嘅重要棋子，支援哈利卡尼同孫興民唔講得笑。不過，熱刺防中艾歷迪亞因傷未有隨軍，右閘捷比亞啱啱轉投馬體會，丹尼路斯亦盛傳將被出售而冇赴星洲，冇咗幾名中後場主力，焗用新仔唔多穩陣。加上雙方近4次交手，3次開3球或以上，2.5球大盤不容錯過。