去到周一早上，西雅圖海灣者將會主場同波特蘭伐木者上演美職「西北太平洋打吡」。有南美雙子雷迪亞斯同盧迪路擔大旗嘅海灣者，主場氣勢逼人，面對作客表現飄忽嘅伐木者，要搶3分難度不大，一於捧主勝。
（myTV Gold 301、Now 638、有線614及654台周一早上9時30分直播）
西雅圖海灣者早前由於有多位主力離隊踢太公波，走勢下滑，隨住美洲盃同美洲金盃相繼落幕，南美雙子雷迪亞斯、盧迪路、同美國攻擊手基斯甸路爾丹都已經歸隊，海灣者終於齊章，實力大增。其中烏拉圭中場好手盧迪路早前喺美洲盃大放異彩，技術絕對不輸喺歐洲各大聯賽揾食嘅一班隊友，返回聯賽搭住秘魯射手雷迪亞斯，有力擔起海灣者進攻大旗。
伐木者近況一般
伐木者上仗去到下半場尾段，先至靠伊保比斯嘅入波逼和奧蘭多城，狀態麻麻，尤其球隊近5仗作客僅取2勝1和2負，發揮略欠說服力。相比之下，高踞東岸前列嘅海灣者，近4仗主場出擊贏晒，優勢明顯，為重奪西岸2哥位置，今場喺地頭出擊肯定劍指攞晒3分，主勝值得留意。
