今日得3場波受注，阿King度咗條3串1畀大家，瑞典超卡爾馬主場對佐加頓斯可作重心。卡爾馬攻力極度疲弱，成為戰績欠佳主因，而佐加頓斯連續2仗失分，為爭下屆歐洲賽入場券要發力搶分，今仗小讓平半，捧上盤。

（周二凌晨1時開賽）

卡爾馬自5月中擊敗希爾星堡後，已連續7仗聯賽未贏過，佢哋最大問題係前線撻極都撻唔着，開咧自今打咗15場聯賽，入得11粒咁大把，單計近7場聯賽入得2球，火力極疲弱，已跌落下游掙扎。「4哥」佐加頓斯近況亦麻麻，連續2仗打和艾斯基斯杜拿同馬模，依家打少1場落後「3哥」赫根1分，為爭取前3名玩歐洲賽，係時候踩油努力搶分。翻查紀錄，雙方近5次交手，佐加頓斯取得4勝1負佔優，今場小讓平半，上盤值得捧場。

聖保羅啞火捱「細」界
同時間開波另一場瑞典超，哈馬比主場對艾夫斯堡，哈馬比連贏2場強勢反彈，更狂轟9球，而艾堡連續6仗聯賽未贏過，狀態曳爆，不過哈馬比主勝太熱冇肉食，轉捧入球大更佳。最後巴甲獨腳戲，聖保羅主場對查比高恩斯，查比高恩斯近4仗作客輸晒，但聖保羅亦唔弗，近10場正式賽事入得5粒，全開2球或以下，捧細盤為妙。