聽朝另一場國冠盃北美站賽事，有拜仁慕尼黑出戰AC米蘭。牌面睇呢場拜仁似乎會輕鬆贏波，不過唔講唔知，原來拜仁喺國冠盃患有「恐意症」，最近3次國冠盃對親意甲球隊都輸波，包括前年喺深圳大敗畀今場對手AC米蘭0比4，國冠盃始終係熱身賽，爆冷場合多，今場一於捧AC米蘭讓球客勝。
（myTV Gold周三早上9時直播）
拜仁慕尼黑雖然喺上場國冠盃以3比1擊敗皇馬，睇落好似好勁，但呢支皇馬今非昔比，而且夏薩特處子戰未同隊友夾熟，唔應該過分睇好拜仁，而且佢哋前線過於倚賴箭頭羅拔利雲度夫斯基，雖然佢兩場都有入波，但AC米蘭防守力強，只要主力防守好佢，拜仁唔係咁易搵到入波板斧。
拜仁暫時只得新仔艾比做「羅拔仔」嘅替補，中鋒板櫈深度略嫌不足，而且呢支德甲班霸只當國冠盃為試陣場合，近10場國冠盃法定時間只得3勝1和6負，勝負唔會太過上心。
近3次國冠盃對意甲兵全捧蛋
AC米蘭改由新帥甘保羅接替加度素掌舵，即簽入皇馬後衞迪奧靴南迪斯，並有外借嘅前鋒安達施華回歸，配合神鋒比亞迪克及蘇索，不容小覷。最重要係拜仁有「恐意症」，近3次於國冠盃面對意甲球隊全敗之餘，更全部食白果，包括舊年不敵祖雲達斯0比2，前年分別慘吞國際米蘭2蛋及AC米蘭4蛋，非常羞家，今場讓波擇使，讓球客勝值得捧場。
