调整心态扑击尼日利亚
今晚早场A组尼日利亚女足同南韩女足相遇争开胜门。南韩首战面对超班兼有主场之利嘅法国，大败无可厚非，其实「太极虎」整体质素唔曳，今仗一众女将只要调整好心态，面对牌面稍弱嘅尼日利亚，可以赢波保持出线机会，客胜属不二之选。（周三晚9时开赛）
南韩首战面对法国明显有啲怯场，队长赵昭贤赛后都直言发挥失准：「见到球队首战表现唔出应有水准，我觉得好失望，不过我哋已经将失利抛诸脑后，集中精神应付嚟紧嘅小组赛事。」除咗呢位效力韦斯咸嘅中场外，车路士中场池笑然同神户雌狮嘅「人气王」李玟娥都喺国外联赛搵食，南韩整体实力唔差得过一啲欧洲球队。为摆脱上仗失利嘅阴霾，相信一班「太极虎」球员已经做好背水一战嘅心理准备，第一步就係喺今晚取得小组首捷先。
超霸鹰患「恐亚症」
相比之下，尼日利亚整体质素无疑较低，实力唔够都算，最麻烦係同男足一样，球员战术意识极为薄弱，经常各自为战。上仗面对挪威就惨吞3蛋，令人失望。呢支非洲「超霸鹰」虽然喺过去7届都成功打入世盃决赛周，不过有6次小组就毕业，近3次决赛周面对亚洲球队仲输晒，表现毫无说服力，今场都好难同南韩抢分，捧番客胜好过。