双英会师马德里争做欧洲1哥
万众期待嘅欧联决赛今晚于马德里上演，由连续两年杀入决赛嘅5届冠军利物浦，迎战决赛初哥热刺。「红军」吸收过上届饮恨教训，加上早前成为「英超史上最强亚军」，球员嗰种深深不忿及对捧盃嘅渴望，绝对成为最大推动力，利物浦让半一，乐比睇好上盘！
（无綫myTV Gold 303、Now 643、有线656及616台周日凌晨3时直播）
利物浦领队高普执教生涯虽然多次同奖盃无缘，畀球迷嘲笑係「二奶领队」，但公道讲句，佢都赢过德甲及德国盃冠军，上届亦带领「红军」战至最后阶段，论大赛成绩同经验，赢执教生涯未获任何大赛锦标嘅热刺主帅普捷天奴几条街。再者高普係位民望甚高，心理质素极佳嘅领袖，最擅长团结及激发球员斗志，当利物浦4强首回合不敌巴塞0比3时，冇人估到佢哋次回合可以反胜4比0，证明「红军」就好似弹弓咁，拉得愈紧，反弹得愈劲。
高普经验赢普帅几条街
点解乐比成日执着于球队及领队嘅历史往绩，因为一场过嘅决赛，一瞬间决定同细节处理绝对主宰生死，呢种功力係需要经验累积。就算普捷天奴能力几咁高，决赛经验始终有限，加上热刺离开主场成绩令人失望，近11场非主场赛事输咗9场，「抗逆」能力令人怀疑。
论牌面，利物浦拥有英超神射手穆罕默德沙拿及沙迪奥文尼，英格兰球员先生华基尔云迪积克，金手套艾利臣比加，加上今季联赛「双杀」热刺，获睇好合情合理，而且罗拔图法明奴伤愈可重组「埃及文明」，配合两闸安德鲁罗拔臣及阿历山大阿诺特嘅侧击，足以摧毁热刺。
热刺首席球员哈利卡尼亦都伤愈，反而令普捷天奴陷两难局面，因为热刺喺冇卡尼嘅多场重要战役中，靠孙兴民同卢卡斯莫拉打突击更有威胁，若果普捷天奴执意搵卡尼担正的话，只会令利物浦胜算更大。