随住各大欧洲主流联赛徐徐谢幕，轮到两大欧洲盃赛上演终极对决，咁跷都係全英内讧，绝对被称为英超盛世攞晒彩，今晚先举行地位较低嘅欧霸盃决赛，爆发伦敦打吡，由车路士硬撼死敌阿仙奴。
两军在英超表现非常「海鲜」，时好时坏，今次交锋属半斤八両。论牌面，有夏萨特嘅车仔点都高啲，不过佢哋喺联赛位列第3，已肯定可参加下届欧联，相比之下，只係「5哥」嘅阿仙奴，就一定要靠勇夺欧霸盃，先可取得下届欧联入场券，战意赢晒。赔率方面，车仔只係让平半，但有近2倍嘅高水，略嫌好分得滞，边有咁大隻蛤乸随街跳，贪高水者随时损手烂脚。
我经常强调，1场过嘅淘汰赛充满变数，不能单凭某队实力较强就可胜出，始终佢哋赢波被认为係理所当然，压力相对更大，相反，较弱一方冇心理包袱下出战，随时出奇制胜，好似日前西盃决赛华伦西亚就爆冷击败巴塞，点样适当地为球员减压，好考领队工夫。阿仙奴主帅艾美利3领西维尔入欧霸盃决赛，对手包括利物浦在内有强有弱，但佢都能调整好球员心态作战，劣势下临场调动得宜，呢种经验係「千年老二」、车仔教头沙利所欠缺，所以我撑兵工厂。