西甲攻略︰拉科勢「大」戰華歷簡奴

周一西甲獨腳戲，中游分子拉科魯尼亞主場出擊，面對要為護級而戰的華歷簡奴。拉科有首席門將盧斯停賽，後防有隱憂，而且華歷簡奴近期頻頻開「大」，加上兩隊近三次交手都多入波，所以今場宜捧入球「大」。（球賽編號：星期一6；now632台明日3:30am直播）
 客軍有前冇後多入波
拉科近況疲弱，歇冬後未嘗一勝，但近兩場總算終止月初聯賽兩連敗之勢，先後與皇家蘇斯達及華倫西亞踢成1:1。今季射入13球的首席射手盧卡斯佩雷斯，上場對華倫建功，取得個人在歇冬後首個入球，腳風轉順，相信他今場會夥拍次席射手路爾斯阿拔圖攻堅。然而，拉科首席門將盧斯上場領黃，累積滿五面黃牌，今場停賽。由於法比仍在養傷，估計拉科今場起用三號門將文奴把關，穩健性及與後衞的默契都令人擔心。
華歷簡奴是一支攻強守弱的球隊，就算面對強隊都願意搶攻。截至今輪西甲前，華歷簡奴今季聯賽賽事總入球達三球的比例僅次巴塞隆拿，華軍今季21戰中，有15場的總入球數為三球或以上，比率為71%，只落後於巴塞的75%，比皇家馬德里的67%更高。包括西盃，華歷簡奴連續四場開「大」，例如早前作客華倫西亞，「入球大細」中位數開到2.5/3球，雙方踢成2:2，亦順利開「大」。上場華軍就在主場大勝切爾達3:0，其中祖沙比特連續兩場都有「士哥」，腳風大順。華歷簡奴續有門將東奴及高賓奴養傷，今場料由桑卡路士把守最後一關。
往績上拉科稍為秤先，近四次交手得兩勝兩和，但主場的兩次都只能踢成平手。在兩軍近三次交鋒中，入球都偏多，包括拉科上次在兩年前迎華軍，踢成2:2收場。至於在今季初，拉科就作客以3:1贏波，盧卡斯佩雷斯及路爾斯阿拔圖都有入波。