今晚另一场欧联16强首回合，褪色法甲劲旅里昂主场迎战意甲班霸祖云达斯。里昂今季多线作战疲于奔命，近况明显下滑，就算有地利亦唔敢冒进，祖记向来踢法慢热，尤其係客场出击，初段经常老鼠拉龟冇碇埋手，半场和值得捧场。

（Now 644、有线661及601台周四凌晨4时直播）

法甲沦落中游嘅里昂，今届欧联喺G组6战2胜2和2负得8分，仅以1分之差压过宾菲加及辛尼特获次名出线16强，表现唔算标青。除咗法甲及欧联之外，里昂仲要应付法联盃及法足盃共4条战线，连场征战消耗极大，近期成绩亦明显跌Watt，近6场只得2胜2和2负，相信主场出击亦唔敢轻举妄动。虽然箭头穆沙迪比利仍士哥不断，但核心迪比上年年尾重伤提早收咧，呢位荷兰国脚今届6场欧联轰5粒，冇咗佢进攻大打折扣。睇番里昂上届16强首回合曾喺主场与巴塞隆拿互交白卷，证明佢哋只要专心防守，对手想破关绝非易事。

斑马兵团客战睇定食
「斑马兵团」祖云达斯自从今季改由沙利领军后，其主打嘅控球打法，确係可减低防线嘅压力，但传控嘅关键係透过耐心传送，慢慢搵到对手空位而作出致命一击，就算阵中拥有基斯坦奴朗拿度、保罗戴巴拿及希古恩等擅射之人，呢点仍未做得好，尤其係比赛初段分外慢热，喺对手好气好力之下，总係老鼠拉龟冇碇埋手。

计晒联赛同盃赛，祖记今季17场作客比赛有13次开出半场和，若果连同上届赛事在内，近5场欧联作客赛事，有4次半场同对手未分高下，包括今届3场作客分组赛及上届16强首回合，相信今仗会稳打稳扎，次回合返主场先佢死过，半场和不妨追多铺。