隨著英超開鑼，轉會窗亦同時關閉，曼城意外地讓出了購物王的位置予稀客阿仙奴，但亦花了1.5億鎊增兵，在使錢龍虎鎊中排第二。

　　連同這1.5億鎊在內，曼城領隊哥迪奧拿自2008年踢而優則教以來，11年的領軍軌跡上，包括執教巴塞隆拿、拜仁慕尼黑及曼城3隊波，已共花13億歐元收購球員，折合115億葡幣。有咩職業可以畀過百億你揮霍？足球領隊就可以了。

　　曾經有球迷批評，有哥迪奧拿咁嘅資源，隊波搵邊個教都得啦。此言差矣！你試下畀艾拿戴斯或者布魯士教曼城，一定仆直！

　　前晚英超開鑼戰，愛隊利物浦以無敵姿態擊敗諾域治，順利先拔頭籌，可惜卻有門神艾利臣比加受傷，希望他不會唞太耐，否則必影響紅軍的爭標大計。

　　首場比賽，比利時中鋒奧歷治再做福將，開波初段即令對方擺烏龍，其後亦獅子搖頭建功，看來的確愈踢愈有信心了。

　　至於白頭沈最開懷的，是彷彿看到穆罕默德沙拿回到第一季的踢法，減少了個人獨食，傳送、射門更加果斷。

　　或者去季歐冠奪冠，令穆罕默德沙拿放下了被賤人沙治奧拉莫斯監生扯甩骹的心魔，希望這位埃及之王再接再勵，協助利物浦一圓英超夢。