曾经嘅郁金香军团已经进入人生新阶段。 喺2010年，世界上无论民生定系体育都有唔少盛事发生。冬季奥运会喺2月嘅加拿大卑诗省温哥华绽放；全球瞩目嘅世界博览会则从5月开始喺上海持续盛开；而去到11月，广州亚运会亦不甘寂寞。但对于球迷而言，2010年6-7月嘅南非先系真正嘅戏肉，皆因4年一届嘅世界杯正式在此揭幕。

讲起2010年南非世界杯，大家嘅第一印象当然系西班牙通过捧杯正式宣告足坛进入斗牛士统治时期。但喺决赛中饮恨收场嘅荷兰，其实同样值得大家嘅尊重，佢哋用无比坚韧嘅意志几乎洗脱无冕之王嘅称号。佢哋距离夺冠只有一步之遥，纵有无尽嘅遗憾，但都俘虏咗一大批郁金香军团嘅新粉。

光阴似箭，当时间踏入至2019年之时，当年嘅荷兰风暴缔造者们已经逐渐嚟到咗职业生涯嘅终点站。喺5月，云佩斯宣布挂靴；7月，洛宾确认告别；嚟到8月13日，史奈达挥手说再见；如果再加上上年11月已经退隐江湖嘅云达华特，荷兰国家队曾经嘅一个黄金时期正式宣布成为回忆。

唔知从几时开始，所有嘢都开始有咗期限，曾经以为会一直伴随到老嘅事物，其实都系会有告别嘅一日。喺今年，曾经嘅几位荷兰巨星都纷纷进入人生一个新阶段，而纵然有再多嘅不舍，人生列车都依然会系高速行驶。无人可以敌得过时间老人嘅拜访，所以美好嘅回忆请好好埋于心底，让属于2010年嘅嗰一抹橙色永远飘荡喺足坛圣所当中。