近况回落作客唔敢冒进

周日晚英超头场戏码，般尼茅夫主场迎战阿仙奴。阿仙奴又要面对「黑色11月」魔咒，今季亦唔例外，「兵工厂」喺最近3场联赛全部打和，场场都有失波，领队艾美利首要任务就系稳住后防，相信经过国际赛期嘅调整，作客会先打稳阵波，佢的今季12场联赛9次开半场和，不妨再追。

阿仙奴之前连盃赛曾经缔造11连胜强势，可惜10月尾开始就受「黑色11月」魔咒缠绕，联赛3连和夹埋痛失6分，对利物浦和波仲叫情有可原，但对住水晶宫同狼队都失分，就真系同之前成绩有天渊之别。翻查对上4季阿仙奴踏入11月嘅成绩，合共踢过21场，只系赢得8场，胜率不足4成，真系唔到你唔信邪。

更不幸嘅系，阿仙奴有后备前锋韦碧克因伤提早收咧，两大前锋奥巴美扬及拿卡锡迪亦受伤患困扰，状态未回复十足，前者喺10月底对水晶宫士哥之后就未入过波，导致球队好多时进攻都系「老鼠拉龟」。

般尼茅夫主场极硬淨

主队般尼茅夫并非善男信女，尤其地头出击，近9战主场取得6胜2和仅1败，唯一败仗系喺补时失守以1比2倒输畀曼联，虽败不辱，阿仙奴造访此地肯定恶踢，喺近况回落下相信唔敢冒进，教头艾美利应採用留前斗后策略。再者「兵工厂」今季联赛有个怪现象，就系半场从未领先过，12轮有9次和波同3次落后，睇嚟佢的今仗半场都难以领先，半和不妨再追。