苏拿利接手赢到开巷

今晚西甲头场全面复甦嘅「银河舰队」皇家马德里作客伊巴。自从苏拿利中途接手掌舵后，皇马赢到开巷，唔好话个输字，连个和字都唔识点写，而且要为莫迪历争金球奖造势，撞正「私房菜」伊巴仲唔起筷羊，直取让球客胜。

经过季初连场败仗、兼在国家打吡以1比5惨败畀死敌巴塞后，主帅洛佩特吉喺上月尾冇得留低，本来搵二队教头苏拿利顶住先，点知呢位球员时代「最佳第12人」愈教愈顺，接手后4场赢晒，终于喺月中获得扶正。呢类巨型班球员听话紧要过战术了得，依家班大帝明显都服晒苏帅，睇嚟仲有排赢。

争大捷为「魔笛」造势

至于《法国足球》杂志举办嘅金球奖，将会喺下月3日揭晓，据报《法国足球》工作人员已经去左马德里，相信都系皇马中场莫迪历、后卫华拉尼同马体会前锋基沙文之争，后两者为法国捧走世盃，岩岩获《GQ》杂志选为年度最佳男运动员嘅莫迪历都唔好咁老定，始终华拉尼打后卫比较蚀底，相信皇马会全力为「魔笛」造势。何况皇马食惯伊巴，近5次交手赢左4次，其中3次至少赢2粒，让球客胜有买趁早。