基沙文发表「大佬论」唔衰得

今晚西甲尾场爆发「两派大战」，「3哥」马德里体育会主场火併榜首巴塞隆拿。马体会向来硬淨见称，从来唔惊「技术流」巴塞，王牌基沙文讲明留队系唔想畀美斯骑住，今场梗系要骚哥利，马体会挟不败主场兼受让，让球主胜咪错过！

赛前西班牙传媒搵左远赴西亚搵食嘅两军名将沙维同基比分析，沙维预测巴塞赢2比1，而基比强调两队风格完全唔同，仲话如果马体会改踢巴塞式tiki taka打法，唔使旨意夺冠，明撑主帅施蒙尼近几年奠定嘅硬淨防守、快速反击战术。虽然呢招遇上死守对手会「老鼠拉龟」，但对住强队多数奏效，包括近6次对巴塞3次唔输，甚有相剋味道。

马体会王牌基沙文近日透露巴塞今夏曾搵佢过档，但佢最终拒绝左，原因系踢得几好都只系辅助美斯，一世畀人骑住，相反马体会全队上下都「十卜」佢，成为呢位法国国脚留队主因，呢番心迹亦令队内士气提升。

「床单兵团」8次主场7胜1和

美斯上一轮对贝迪斯嘅联赛复出兼省两粒，但巴塞仍以3比4落败，防守出现好大问题，今仗仲有中场拿杰迪锡坐波监，令拦截力削弱。相反马体会有卢卡斯靴南迪斯及迪亚高哥斯达等强悍主力复操，相信可赶及披甲，施蒙尼仲专登加强反抢打突击嘅训练，希望逼到「地上最强」有气冇碇抖。「床单兵团」今季各项赛事8次主场出击，豪取7胜1和未输过佳绩，有得受让咁笋，必捧让球主胜。